Այս տարի Երևանի Մխիթար Հերացու անվ.պետական բժշկական համալսարանը տոնում է իր հիմնադրման 95-ամյակը: Շուրջ մեկդարյա պատմության ընթացքում այստեղ մասնագիտացել են և բժշկի որակավորում ստացել մոտ 31.000 շրջանավարտ, որոնք իրենց կարևոր տեղն են զբաղեցրել Հայաստանի առողջապահության ոլորտում` կերտելով առողջ հայրենիք: Հենց այս կարգախոսով և իրենց նվաճումներով ու վերջին նորություններով էր Կրթություն և Կարիերա էքսպո 2015-ին մասնակցում Երևանի Մխիթար Հերացու անվ.պետական բժշկական համալսարանը:
Առանձնահատուկ ուշադրության է արժանի նաև բժշկական համալսարանի ծավալած կլինիկական գործունեությունը: Մ.Հերացու անվան պետական բժշկական համալսարանի կլինիկաները ներկայումս ընդրգկված են «Մուրացան» և «Հերացի» հիվանդանոցային համալիրներում:
«Հերացի» հիվանդանոցային համալիրի կազմում են Հայաստանի առաջին ստացիոնար բժշկական հաստատությունները` թիվ 1 կլինիկական հիվանդանոցը, թիվ 1 մանկական կլինիկական հիվանդանոցը և Հայաստանի առաջին մասնագիտացված ակնաբուժարանը` ակնաբուժական «Մարի Նուպարի» կլինիկան :
«Հերացի» հիվանդանոցային համալիրի կազմում է նաև համալսարանական թիվ 1 ստոմատոլոգիական պոլիկլինիկան:
«Մուրացան» հիվանդանոցային համալիրը հիմնադրվել է 1961թ.-ին որպես քաղաքային 4-րդ մանկական կլինիկական հիվանդանոց` մի քանի հիվանդանոցային և պոլիկլինիկական ստորաբաժանումներով:
Համալիրի կազմում է նաև 2006-ից համալսարանական դարձած թիվ 2 ստոմատոլոգիական պոլիկլինիկան։
Բուհի ավելի քան 1100 դասախոսներից 171-ը գիտությունների դոկտորներ են,504-ը`գիտությունների թեկնածուներ: Գիտական հզոր այս ներուժը լուրջ դերակատարություն ունի Հայաստանում բժշկագիտության և հարակից գիտությունների զարգացման գործում:
Այսօր Երևանի Մ.Հերացու անվան պետական բժշկական համալսարանի 7 ֆակուլտետներում մասնագիտանում է մոտ 6360 ուսանող, նրանցից 1184-ը`աշխարհի տարբեր երկրներից: Ուսումնագործնական և գիտահետազոտական աշխատանքները կազմակերպվում են գործող 100-ից ավելի ամբիոններում,Երևանի առաջատար կլինիկական բազաներում և գիտահետազոտական կենտրոններում:
Հասցե՝ Կորյունի 2, Երևան, 0025, Հայաստան
Էլ. փոստ՝ info@ysmu.am
Հեռախոս՝ (+374 10) 58 25 32
Ֆաքս՝ (+374 10) 58 25 32