Հայաստանի ազգային պոլիտեխնիկական համալսարանը 8 տասնամյակից ավելի ծավալած գործունեության ընթացքում ունեցել է ավելի քան 115 000 շրջանավարտներ,որոնք լուրջ դերակատարում են ունեցել հանրապետության տնտեսության զարգացման գործում:
Ապրիլի 20-22-ը կայացած «Կրթություն և կարիերա EXPO-2016» խորագրով 16-րդ միջազգային մասնագիտացված ցուցահանդեսին մասնակից ավելի քան 70 կրթական հաստատությունների շարքում, իր ակտիվ մասնակցությունն ունեցավ նաև Հայաստանի ազգային պոլիտեխնիկական համալսարանը:
Տեխնիկական գիտությունների բնագավառի հայաստանյան խոշորագույն գիտակրթական կենտրոնը՝ Պոլիտեխնիկը, այս տարի ներկայացավ կրթական, գիտահետազոտական և միջազգային առանձնահատուկ ծրագրերով` հատուկ տեխնիկական միջոցով՝ գերզգայուն ինտերակտիվ մոնիտորի առկայությամբ, որը հնարավորություն ընձեռեց անմիջապես տաղավարից «ՎԻՐՏՈՒԱԼ ՏՈՒՐ» կազմակերպել Պոլիտեխնիկում:
Ներկայումս համալսարանն ունի ավելի քան 8000 ուսանող իսկ պրոֆեսորադասախոսական կազմը բաղկացած է գիտության գործիչներից՝ գիտությունների թեկնածուներ, դոցենտներ, դոկտորներ, պրոֆեսորներ և ակադեմիկոսներ:
ՀԱՊՀ-ն ունի 3 մասնաճյուղ` Գյումրիում,Վանաձորում և Կապանում:
Եռօրյա ցուցահանդեսի ընթացքում Պոլիտեխնիկական համալսարանի տաղավարը մարդաշատ էր: Բոլորը շտապել էին ծանոթանալու 2016-2017 ուսումնական տարվա նորություններին, սպասվող ծրագրերին:
«Կրթություն և կարիերա EXPO-2016 ցուցահանդեսի տաղավարում առկա հաղթական գավաթները, Պոլիտեխնիկի ուսանողների ուսումնական հաջողությունների և նրանց բուռն, հագեցած առօրյայի վկայությունն էին: