Հոկտեմբերի 6-ին Երևանում բացվեց «ՊանԱրմենիան էքսպո 2017» 8-րդ միջազգային բազմաբնույթ ցուցահանդեսը, որն անցկացվեց մայրաքաղաքի հիմնադրման տոնի՝ «Էրեբունի-Երևան» միջոցառումների շրջանակում: Մասնակցում էին ավելի քան 120 կազմակերպություններ Հայաստանից, Ռուսաստանից, Վրաստանից, Իրանից, Ավստրիայից, Գերմանիայից, Իտալիայից, Չինաստանից: Այս մեծածավալ միջոցառման կազմակերպիչները նպատակ ունեին ճանաչելի դարձնել հայրենական արտադրանքը և բարձրացնել պահանջարկը, Հայաստանի և Սփյուռքի տնտեսական, մշակութային, գիտատեխնիկական կապերի ամրապնդման և զարգացման համար ստեղծել գործարար հարթակ, խթանել հայրենական արտադրանքի արտահանումն ու համատեղ գործարար և ներդրումային ծրագրերը, բացահայտել Հայաստանի տնտեսական ներուժը:
Ներկայացված էին առողջապահության, արդյունաբերության, բեռնափոխադրման, գյուղատնտեսության, սննդարդյունաբերության, զբոսաշրջության, սպասարկման և այլ ոլորտներ: «ՊանԱրմենիան էքսպո 2017»-ում ներկայացել էր նաև Երևանի քաղաքապետարանը՝ ներդրումային առաջարկների իր փաթեթներով (քաղաքաշինության, երթևեկության բարելավման, զբոսաշրջության զարգացման, մշակութային ժառանգության պահպանման և արդիականացման, բնապահպանության, էներգախնայողության և վերականգնվող էներգետիկայի ոլորտներում):
Ցուցահանդեսին գեղեցիկ ու յուրահատուկ տաղավարով ներկայացավ նաև «Հայացք» ընկերության գործընկերը՝ «Աղորիք» ընկերությունը: Հայրենական այս արտադրանքը արժանացավ ուշադրության և մեծ հետաքրքրություն առաջացրեց:
Հարկ է նշել, որ միջազգային ցուցահանդեսը կգործի մինչև հոկտեմբերի 8-ը ներառյալ:
«Հայացք» ընկերությունը ցուցահանդեսի ինֆորմացիոն գործընկերն է։