Նոյեմբերի 3-ին Երեւանում Stomline dental clinic-ի և Dental Boutique-ի նախաձեռնությամբ իր աշխատանքները սկսեց վերականգնողական ստոմատոլոգիայի ազգային 2-րդ կոնգրեսը: Երկօրյա համաժողովին մասնակցում էին ատամնաբուժության ոլորտի առաջատար ու փորձառու մասնագետներ Հայաստանից, Արցախից եւ արտերկրից: Համաժողովի անցկացման առաջին օրը Երեւան ժամանած հայ եւ արտասահմանցի լավագույն մասնագետները հանդես եկան զեկուցումներով, բժիշկ-ստոմատոլոգներին ներկայացրեցին իրենց առաջավոր փորձը և ոլորտում կիրառվող նորարարական մեթոդները:
Իրենց խոսքում ներկաները արդյունավետ համարեցին նմանատիպ միջոցառումների անցկացումը, որը արագ տեմպերով առաջ ընթացող բնագավառի զարգացումներիի համար նոր ուղենիշներ է նախանշում՝ նպաստելով իրականացվող ծառայությունների որակի էապես բարձրացմանը:
Նոյեմբերի 4-ին՝ համաժողովի աշխատանքային երկրորդ օրը գործնական բնույթ էր կրում: Ատամնաբույժները հնարավորություն ունեցան մասնակցելու ճանաչված ու պրոֆեսիոնալ մասնագետների վարպետաց դասերին, գործնականում ծանոթանալու նրանց հաջողված փորձին:
Հավելենք, որ համաժողովը բարեգործական բնույթ էր կրում և միջոցառման շրջանակում հավաքված ֆինանսական միջոցները կտրամադրվեն «Հայ» ասոցիացիա հիմնադրամի «Հայ մանուկ» ծրագրին, որը զբաղվում է արտամարմնային բեղմնավորման հովանավորությամբ: Համաժողովից ստացված գումարների շնորհիվ անպտղությամբ տառապող ֆինանսապես ոչ ապահով զույգերը կկարողանան իրականացնել իրենց կյանքի երազանքը: «Շատ կարևոր է, որ այս մարդասիրական քայլին մասնակցում են հենց բժիշկները: Համաժողովի կազմակերպիչներին ու ներկաներին շնորհակալություն եմ հայտնում այն մանուկների կողմից, որոնք պետք է լույս աշխարհ գան, եւ այն զույգերի անունից, որոնք առաջիկայում կվայելեն ծնող դառնալու բերկրանքը»,-նշեց «Հայ» ասոցիացիա հիմնադրամի նախագահ Տիգրան Հովհաննիսյան-Հակոբյանը:
Բոլոր լուսանկարներն ԱՅՍՏԵՂ․․․
Տեսանյութը՝ ՇՈԻՏՈՎ… www.hayacq.am