«Հայաստանում Եվրոպական Քոլեջ» հիմնադրամը միջին մասնագիտական ծրագրեր իրականացնող կրթական կազմակերպություն է: Քոլեջը հիմնադրվել է 2006-ին Եվրոպական կրթական տարածաշրջանային ակադեմիայի հոգեբարձուների խորհրդի որոշմամբ: Մեր երկրում ներդնելով եվրոպական զարգացած երկրների առաջավոր և ժամանակակից փորձը, քոլեջը միջին մասնագիտական կրթական ծրագրեր է իրականացնում մայրաքաղաքում և ՀՀ մարզերում՝ մասնաճյուղերի միջոցով:
Քոլեջի կրթական ծրագրերը լիովին համապատասխանում են ինչպես ՀՀ կրթության և գիտության նախարարության չափորոշիչներին, այնպես էլ եվրոպական կրթական ծրագրերին: Քոլեջում մշտապես հետամուտ են, որ ուսանողներն ստանան եվրոպական կրթություն, որ հարգի և ընդունելի է ողջ աշխարհում: Եվրոպական չափորոշիչներին համապատասխան կրթությունը լավ ու հեռանկարային աշխատանքի թիվ 1 երաշխիքն է:
Ելնելով արդի կրթական պահանջներից, Եվրոպական քոլեջում առաջնային կարևորություն էր տրվում հատկապես օտար լեզուների և համակարգչային խորացված ուսուցմանը: Գաղտնիք չէ, որ միջազգային լեզուների լավ իմացությամբ, կիրթ ու գրագետ կադրերը մեծ պահանջարկ ունեն ողջ աշխարհում: Եվրոպական քոլեջը փորձում է ետ համաքայլ լինել համաշխարհային կրթական պահանջներին:
Քոլեջում գործում են ուսուցման անվճար և վճարովի համակարգեր: Ուսման բարձր առաջադիմությամբ վճարովի համակարգում սովորողները փոխադրվում են անվճար ուսուցման համակարգ` ցածր առաջադիմություն ցուցաբերած ուսանողների փոխարեն: Գործում է նաև զեղչերի ճկուն համակարգ: Քոլեջում սահմանված է արտոնությունների ցանկ՝ անվճար ուսուցում, զոհված ազատամարտիկների, հաշվանդամության խումբ ունեցող և երկկողմանի ծնողազուրկների համար: Քոլեջի ղեկավարությունն այժմ բանակցություններ է վարում իր էստոնական կողմի հետ՝ գործընկերների շրջանակն ընդլայնելու և նորացնելու ուղղությամբ: Այն հնարավորություն կտա հայ ուսանողներին Էստոնիայից բացի, պրակտիկա անցնել եվրոպական մի շարք երկրներում:
Վերջերս Եվրոպական քոլեջում հյուրընկալվել էին Վարշավայի հումանիտար ավագ դպրոցի ներկայացուցիչները:Հանդիպման ժամանակ կրթօջախների միջև կնքվեց պայմանագիր` հետագա համագործակցության նպատակով:
Ապրիլի 21-23-ը մայրաքաղաք Երևանում՝ «Yerevan EXPO» ցուցասրահում անցկացվեց «Կրթություն և կարիերա EXPO 2015» 15-րդ միջազգային մասնագիտացված ցուցահանդեսը: Նպատակն էր ներկայացնել կրթության կարևորագույն ոլորտների գործունեությունը, նորությունները, դիմորդներին տրամադրել ամբողջական տեղեկություններ՝ գործող կրթական հաստատությունների վերաբերյալ: Ցուցահանդեսին նոր ձեռքբերումներով և առաջարկներով առաջին անգամ մասնակցում էր նաև Եվրոպական քոլեջը: