Նրանք ծնվում են, որ ապացուցեն,
Թե վերջը մի տեղ դառնում է սկիզբ:
Նրանք ծնվում են, որ ապացուցեն,
… Թե այնտեղ է լոկ սխրանքն սկսվում,
Ուր վերջանում է ամե՜ն մի հնար…
Պարույր Սևակ
Այսօր էլ հայ ժողովուրդը շարունակում է իր պայքարի, իր գոյատևման ճանապարհը: Մի ճանապարհ, որն արդեն տևում է հազարամյակներ ու հարուստ է հաղթանակի, հզորության, պարտության, երջանկության ու հիասթափության պահերով: Անկախացած Հայաստանի Հանրապետությունը, չկողմնորոշված երիտասարդի նման, կորցրել է իր ճանապարհը ու ոչ մի կերպ չի կարողանում իր տեղը գտնել այս մեծ աշխարհում: Մեր անտարբերությունը, անգործությունը ու սեփական ես-ի գերագնահատումը կոտրեցին ու ստիպեցին մեր շատ հայրենակիցների հեռանալ հայրենի հողից: Արդարացումներն այլևս անիմաստ են: Իրավիճակը ստիպեց մարդկանց այլ կերպ նայել շատ հարցերի ու վերաբերմունքը փոխել մի շարք երևույթների նկատմամբ: Ու այսօր ազգային զարթոնք է ու վերածնունդ, հայ ժողովուրդն աշխարհին միասնականության, համախմբվածության ու պայքարի դասեր է տալիս: Հայն արթնացել է ու գիտակցում է՝ մի նոր այլ որակի ճանապարհ ունի անցնելու: Այն ոգին, որը համախմբում է այսօր բոլորիս՝ հայ ժողովրդի ոգին, միշտ եղել է մեզ հետ և ուղղորդել դժվարին պահին: Այն ժողովուրդը, որը խաղաղ ժամանակ չի կարողանում ապրել ներդաշնակ, դժվարության պահերին միավորվում է ու դառնում բռունցք, անկոտրում բռունցք, որը պատրաստ է դիմակայելու ու հաղթելու: Այդ ոգու վերապրումով էլ մենք պետք է առաջ շարժվենք:
Նյութում օգտագործված են մեր գործընկերների ներկայացրած լուսանկարները:
